Диний ишмер Ибрагим Белхароевдин автоунаасын Назрани шаарында белгисиз адамдар 31-декабрга караган түнү аткылашкан. Окуяда ал өзү курман болуп, айдоочусу оор абалда ооруканага жеткирилген.
“Эркин Европа/Азаттык” радиосунун Кавказ кызматынын кабарына караганда, Ибрагим Белхароевге буга чейин да эки жолу, 2008-жылы жана 2016-жылы кол салуу болуп, анда ал аман калган.
Ибрагим Белхароев - Кавказдагы XX кылымдын башындагы белгилүү суфий аалымы, Батал ажы Белхороевдин чөбөрөсү. Ибрагим өзү расмий диний билим алган эмес. Белхороевдер Кавказда суфизмдин жактоочулары саналат.
Суфизм - IX кылымдарда жаралган исламдагы өзгөчө багыт. Ал Кавказда жана Борбор Азияда кеңири жайылган. Исламдын фундаменталдык багыттарын карманган экстремисттик уюмдар суфийлерди "динди бурмалайт" деп сындап келишет.
