Жогорку Кеңештин Эл аралык иштер, коргоо, коопсуздук боюнча комитети төрт мамлекетке элчилик кызматка көрсөтүлгөндөрдүн талапкерлигин колдоду. Комитеттин отуруму 15-январда болду.
Тышкы иштер министрлиги Орусиядагы элчинин кызматына мурдагы тышкы иштер министри Аликбек Жекшенкуловдун, Түштүк Кореяга тышкы иштер министринин орун басары Динара Кемелованын, АКШга Кыргызстандын Орусиядагы азыркы элчиси Болот Отунбаевдин жана Кытайга дипломат, мурунку элчи Канайым Бактыгулованын талапкерлигин көрсөткөн.
14-январда президенттин жарлыгы менен АКШдагы жана Канададагы элчи Кадыр Токтогулов ээлеген кызматынан бошотулган. Учурда Кытайдагы элчинин орду да бош турат. Мурдагы элчи Азамат Үсөнов декабрда кызматтан бошотулган. (SE)
