20-февралда Талас районунун Кара-Суу айылында иске ууланып 7-класстын окуучусу апасы экөө каза тапты. Бул тууралуу аталган айылдын тургандары билдиришти.
Дагы эки өспүрүм ооруканада жатат. Дарыгерлер билдиргендей, 5 жана 13 жаштагы балдардын абалы оор.
Баштапкы маалыматтарга караганда, үй-бүлө мүчөлөрү мештен чыккан түтүнгө ууланып калган.
Талас облустук ички иштер башкармалыгынын басма сөз кызматы милиция окуя боюнча териштирүү иштерин жүргүзүп жатканын билдирди.
Буга чейин, 11-февралда Бишкектин четиндеги Келечек жаңы конушунда үйлөрдүн биринде өрт чыгып, андан эки-үч жашар үч бала ууланган. Кырсык учурунда балдардын атасы жумушта болуп, ал эми кош бойлуу энеси поликлиникага кеткен. Өрттү көрүп калган кошунасы балдарды өз автоунаасы менен ооруканага жеткирген.
Бишкектеги №3 балдардын тез жардам ооруканасында жандандыруу бөлүмүндө жаткан балдардын абалы оңоло баштаганы айтылууда. (AlS\ErN)