АКШнын президенти Дональд Трамп 25-февралда Вашингтондон Вьетнамга учуп кетти. Ал Ханой шаарында Түндүк Кореянын лидери Ким Чен Ын менен экинчи саммитин өткөрөт.
Эки өлкөнүн башчылары 27-28-февралда корей өзөктүк программасын талкуулаш үчүн жолугат.
Трамп Вашингтондон чыгаар алдында «Твиттерге»: «Толук куралсыздандыруудан кийин Түндүк Корея бат эле экономикалык өсүштүн генератору болот. Ансыз мурда кандай болсо, ошондой бойдон калат. Төрага Ким туура чечим кабыл алат», - деп жазды.
Түндүк Кореянын лидери Ким Чен Ын АКШ президенти Дональд Трамп менен жолугушуу үчүн чопкутталган поезди менен Пхеньяндан Ханойго 23-февралда жөнөп кеткен. Вьетнамга 26-февралда жетет.
Алгачкы саммит былтыр 12-июнда Сингапурда өткөн. Анда эки тарап «Корей жарым аралын өзөктүк куралдан толук арылтууну» үстүртөн макулдашкан.
