АКШ президенти Дональд Трамп Конгресстин Мексика менен чек арада өзгөчө кырдаал режимин жокко чыгаруу боюнча чечимине вето койду. Муну менен Трамп президенттик мөөнөтүндө алгачкы жолу вето коюу укугунан пайдаланды.
Ал Мексика аркылуу Борбордук жана Түштүк Америкадагы өлкөлөрдөн мыйзамсыз мигранттар кирип, Кошмо Штаттарда кылмыштуулук жана маңзат бизнесинин күчөшүнө алып келгенин айтууда. Ошондуктан, өзгөчө кырдаал режимин киргизүү менен абалды көзөмөлгө алууга мүмкүн деп эсептейт.
Дональд Трамп АКШнын Мексика менен чек арасында өзгөчө кырдаал режимин 15-февралда киргизген. Анын бул чечими аталган чек арага дубал курууга каражат бөлүү максатын көздөрү айтылган.
Ага чейин Конгресс Трамптын президенттик шайлоо учурунда эң башкы убадаларынын бири чек арадагы дубал куруу үчүн бюджеттен каражат бөлүүгө каршы чыккан.
Ал эми ушул жумада болсо Конгресстин эки палатасы АКШ президентинин Мексика менен чек арадагы өзгөчө кырдаал режимин жокко чыгаруу чечимин колдошкон.
Эми президенттин ветосун жокко чыгаруу боюнча маселени Конгресстин Төмөнкү палатасы 26-мартта караганы жатат. Ал үчүн конгресс мүчөлөрүнүн үчтөн экиси Трамптын чечимине каршы добуш бериши керек.
