Бишкек ЖЭБ боюнча айыпталган мурдагы жетекчилердин адвокаттары Жогорку соттун төрайымы Гүлбара Калиевага кайрылды. Бул тууралуу мурдагы премьер-министр Сапар Исаковдун адвокаты Нурбек Токтакунов билдирди. Кайрылууда Бишкектин Свердлов райондук сотунда башталып жаткан сот процессине ачык-айкындыкты камсыз кылууну жана журналисттерге шарт түзүп берүүнү суранган.
“Соттун жабык өтүшү ар түрдүү маалыматтарды бурмалоого жана түкшүмөл пикирлерге жол ачат”, – деп айтылат адвокаттардын кайрылуусунда.
Бул кайрылууга Жогорку сот азырынча жооп бере элек.
Бишкек Жылуулук Электр борборун жаңылоодогу коррупция боюнча кылмыш ишин кароо Бишкектин Свердлов райондук сотунда 18-февралда башталган. Бул иш боюнча сегиз адамга айып тагылган. Алардын арасында мурдагы премьер-министрлер Сапар Исаков, Жантөрө Сатыбалдиев, экс-энергетика министри Осмонбек Артыкбаев баш болгон мурдагы жетекчилер бар. Баштапкы соттук жараян жабык өткөн.(BkA)
