Нооруз майрамына арналган көкбөрү боюнча республикалык мелдештин Жогорку лиганын финалында "Ынтымак" командасы жеңишке жетти.
Бүгүн Бишкектеги "Ак-Кула" ат майданында өткөн финалдык таймашта Таластын "Ынтымак" командасы Оштун "Достук" командасын 6:1 эсеби менен утуп алды.
“Ынтымак” ушуну менен Нооруз турнирин үчүнчү жолу жеңди.
Жогорку лигада 3-орунду "Бакубат Талас" командасы алды. 3-орун үчүн беттеште таластыктар "Көк Жал" командасын 7:1 эсебинде жеңген.
Ошондой эле бүгүн Биринчи лиганын финалдык таймашында Таластын "Алкан-Ата" командасы Бишкектин "Келечек" командасын 5:1 эсебинде утуп, мөөрөйдү колго алды.
Бул лигада 3-орунду Ак-Талаанын "Соң-Көл" командасы ээледи. 3-орун үчүн таймашта "Соң-Көл" оюнчулары "Казарман" командасын 1:0 эсебинде жеңген. (BTo/SDz)
