Кыргызстандык жеңил атлет Дарья Маслова «Ташкент эл аралык жарым марафонунда» жеңүүчү болду. Жаштар иштери, дене тарбия жана спорт боюнча мамлекеттик агенттиктин маалыматына караганда, мелдеш 24-мартта Өзбекстандын Ташкент шаарында өтүп, ага 28 мамлекеттен 1658 жөө күлүк катышкан. Алар 21 жана 5 чакырым аралыкка жарышты.
Жарышка Кыргызстандын атынан тогуз жеңил атлет катышып, Дарья Маслова алтын, Адилет Кыштакбеков күмүш медал тагынды.
Дарья Маслова кыз-келиндер арасында жарышка чыгып, 21 чакырым аралыкты 1 саат 12 мүнөт 30 секундда чуркап өтүп, алтын медаль тагынды. Күмүш байгени 1 саат 13 мүнөт 56 секунд көрсөтүчү менен Ситора Хамидова (Өзбекстан), коло медалды 1 саат 16 мүнөт 13 секунд көрсөткүчү менен Екатерина Тунгускова (Өзбекстан) алды.
Эркектер арасында 21 чакырымга чуркоодо мара сызыгына биринчи болуп кытайлык спортчу Линьцян Ян (1:04:43), экинчи болуп кыргыз жеңил атлети Адилет Кыштакбеков (1:05:03) келсе, үчүнчү орунду өзбек спортчусу (1:05:20) ээледи. (GT)
