Кыргызстандагы түрдүү дин өкүлдөрү Бишкектеги Тоголок Молдо эс алуу паркына 100 даана көчөт тигишти. 6-апрелдеги саамалыкка элүүдөн ашуун адам чогулду.
Кыргызстан мусулмандар дин башкармалыгынын башчысы, муфтий Максат Токтомушев, Кыргызстандагы орус православ чиркөөсүнүн эпискобу Даниил жана башка диний уюмдардын лидерлери жана өкүлдөрү эс алуу багынын түрдүү аймагына жаңы көчөттөрдү отургузушту. Дарактарды Бишкек мэриясынын Жашылдандыруу чарбасы берди.
Көчөт отургузуу иш-чарасын Дин иштери боюнча мамлекеттик комиссия конфессия аралык мамилени жакшыртуу, диний уюмдардын ымаласын бекемдөө максатында уюштурду. Ага Европадагы Коопсуздук жана Кызматташтык Уюмунун (ЕККУ) Бишкектеги программалык кеңсеси, Согушту жана тынчтыкты чагылдыруу институту (IWPR) көмөк көрсөттү.
Дин өкүлдөрү көчөт отургузушту
Көчөт отургузууга Дин иштери боюнча мамлекеттик комиссиянын төрагасы Зайырбек Эргешов, мекеменин кызматкерлери жана аталган эл аралык уюмдардын өкүлдөрү да жардам беришти.
Кыргызстанды ислам, христиан, буддизм жана башка бир катар дин өкүлдөрү байырлашат.