Ош эл аралык аэропортунун ондогон кызматкерлери коопсуздук кызматынын башчысы Абдибаит Матиевге каршы нааразы болуп, анын жүрүм-турумун сындап чыгышты. Акция 22-апрелде болду.
Ош аэропорту баш ийген «Манас» эл аралык аэропортунун басма сөз катчысы Алия Курбанова муну бышыктап, окуянын чоо-жайы иликтенип жатканын билдирди.
Ал арада айрым маалымат булактары дарегине айтылган сын-пикирлерден улам Абдибаит Матиев иштен алынганын, мындан аркы ишмердигине карата чечим кызматтык иликтөөнүн жыйынтыгына жараша кабыл алынарын жазышты. Алия Курбанова муну тастыктаган жок. Ал толук маалымат окуянын чоо-жайы такталган соң берилерин айтты.
Абдибаит Матиев аталган кызматка ушул айда дайындалган. (SE)
