Кыргызстандык мушкерлер Мирлан Түркбай уулу менен Эркин Адылбек уулу Азия чемпионатынын жарым финалдык таймашына чыкты. Мелдештин расмий сайтындагы маалыматка ылайык, таймаштар ушул күндөрү Таиланддын Баңкок шаарында өтүп жатат.
Бүгүн, 22-апрелде 49 килограммга чейинки салмакта чейрек финалда күч сынашкан Мирлан Түркбай уулу индонезиялык Комелис Квангу Лангуну 4:1 эсебинде жеңип алды. Түркбай уулу буга чейин 1/8 финалда йемендик Мухаммед Аль-Карнасты 5:0 эсебинде жеңген эле. Эми 25- апрелде Түркбай уулу жарым финалда өзбекстандык Нодиржон Мырзахмедов менен күч сынашат.
81 килограммга чейинки салмакта рингге чыккан Эркин Адылбек уулу чейрек финалда иорданиялык Мохаммед Юнис Сулейманды 5:0 эсебинде жеңди. Адылбек уулу биринчи таймашында (1/8 финалда) кытайлык Гегарибу Зенгди 5:0 эсебинде уткан. Эми ал 25-апрелде өтө турган жарым финалдык беттеште казак мушкери Бек Нурмуганбет менен күч сынашат.
Чейрек финалда дагы бир кыргыз мушкери Азат Үсөналиев (52 кг.) да таймашып, түштүк кореялык Инкю Кимге 3:2 эсебинде жеңилип калды.
Эртең, 23-апрелде кыргызстандык эки мушкер Өмүрбек Бекжигит уулу (75 кг) жана Чыңгыз Борбашев (91 кг) чейрек финалда күчтөрүн сынайт. Бокс боюнча Азия чемпионатына Кыргызстандан тогуз мушкер аттанган. 19-апрелде башталган таймаштар 26-апрелге чейин уланат. (GT)
