Испанияда соңку төрт жылдын ичинде үчүнчү жолу өтүп жаткан чукул парламенттик шайлоодо бийликтеги партия алдыга чыкты. Экзит-поллдор премьер-министр Педро Санчес жетектеген Испаниянын Социалисттик жумушчу партиясы жалпы добуштардын 30 пайызга чукулун алганын көрсөтүп жатат. Баштапкы жыйынтыктар ырасталса, социалисттер коалиция түзүш үчүн башка партиялардын колдоосуна муктаж болот.
Экзит-поллдорго ылайык, Пабло Касадо жетектеген Элдик партия добуштардын 16,8 пайызын, Альберт Риверанын «Жарандар» блогу 14 пайызын алды.
Испан демократиясынын тарыхында биринчи жолу «Vox» аттуу ашкере оңчул партия 9 пайыздык көрсөткүч менен парламентте кеминде 23 мандатка ээ болгону жатат.
Жекшембидеги добуш берүүгө шайлоочулардын 70 пайызга чукулу катышканы белгилүү болду.
Премьер-министр Санчес парламент быйылкы жылдын бюджети боюнча мунаса таба албай койгондон кийин мөөнөтүнөн мурда шайлоо жарыялаган эле.