Түркияга эмгек визасын алган кыргызстандыктардын төлөмү арзандатылды. Бул тууралуу Кыргызстандын тышкы иштер министри Чыңгыз Айдарбеков 7-майда түрк кызматташы менен сүйлөшкөндөн кийин басма сөз жыйынында билдирди.
15-майдан баштап эмгек визасы боюнча консулдук жыйымдардын наркы 283 доллардан 30 долларга чейин төмөндөтүлөрү кабарланды.
Түркияга кыргызстандык жарандардын эмгек визасын ачыш үчүн консулдук төлөмдөр 2019-жылдын 23-февралына чейин 240 доллар болсо, кийин 283 долларга чейин кымбаттаган.
Түркиянын Тышкы иштер министрлигинин маалыматы боюнча 2018-жылы Кыргызстандын 9520 жараны эмгек визасын алган. Алар негизинен жайкы туристтик сезондо Анталия, Измир, Бодрум сыяктуу аймактарга келип иштеп кетишет.
Расмий эсеп боюнча Түркияда 25 миңден ашык кыргызстандык катталган. (ElB)
