Америкалык даңазалуу архитектор, бир катар белгилүү имараттардын автору Юймин Бэй 102 жашында дүйнө салды. Маркумдун эң белгилүү долбоору – Луврдын короосундагы пирамида.
Музейдин кире беришиндеги 20 метрлик айнек конструкция 1980-жылдардын экинчи жарымында Франциянын ошол кездеги президенти Франсуа Миттерандын демилгеси менен тургузулган. Пирамиданы француз коомчулугу көпкө чейин сындап келишкен. Бэй өзү аны эң татаал заказ деп баалаган.
Архитектор 1917-жылы кытайлык банкирдин үй-бүлөсүндө туулган. 18 жашында АКШга көчүп барып, Массачусетс технологиялык институтун, кийин Гарварддын алдындагы дизайнерлердин жогорку мектебин аяктаган.
1983-жылы Бэй архитектурадагы Нобель сыйлыгы деп аталган Притцкер сыйлыгын жеңген.