Линктер

ЧУКУЛ КАБАР!
28-Октябрь, 2021 бейшемби, Бишкек убактысы 08:46

«Авангард-Стройдун» жетекчиси мектеп курулушуна байланыштуу камакка алынды


Иллюстрациялык сүрөт.

Нарын облусунун Жумгал районуна караштуу Ак-Татыр айылындагы мектептин курулушундагы алешемдиктерге байланыштуу «Авангард-Строй» курулуш компаниясынын башкы директору жана облустук капиталдык курулуш башкармалыгынын жетекчилери кармалды. Бул тууралуу Улуттук коопсуздук боюнча мамлекеттик комитеттин (УКМК) коомчулук менен байланыш бөлүмү «Азаттыкка» билдирди.

Кармалгандар Ак-Татырдагы мектепти курууда мамлекетке ири өлчөмдө зыян келтирген деп шек саналууда.

Атайын кызматтын маалыматына караганда, 2014-жылдын 17-сентябрында Нарын облустук капиталдык курулуш башкармалыгы тендердин жыйынтыгында жергиликтүү «Авангард-Строй» жоопкерчилиги чектелген коому менен 275 орундуу мектеп куруу жөнүндө келишим түзгөн. Долбоор 64 миллиондон ашык сомго бааланып, акча бөлүнгөн. Курулуш иштери 2016-жылдын ноябрында бүткөрүлүүгө тийиш эле. Бирок иш белгиленген мөөнөттө бүткөн эмес. Мектеп курулушу боюнча аткарылбаган иштерден мамлекет 8 миллион сомдон ашык зыян тарткан.

Учурда курулуш компаниясынын башкы директору эки айга камакка алынды. Облустук капиталдык курулуш башкармалыгынын кызмат адамдары үй камагында.

УКМК «Авангард-Строй» негизинен Нарын облусунда иш жүргүзүп келгенин жана анын Бишкектеги «Авангард-Стиль» компаниясы менен байланышы жок экенин билдирди.

Аталган компаниянын камакка алынган жетекчисинин ысымы ачык айтылган жок. Шектүү тарап атайын кызматтын маалыматына пикир билдире элек. (NT)

Пикирлерди көрүңүз (2)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG