Бул тууралуу Билим берүү министрлигинин өкүлү Кудайберди Кожобеков парламентте сүйлөп жатып билдирди.
Анын айтымында, өз учурунда 9-класстан кийин окуусун уланта албай калган бардык адамдар кесиптик билим алышат. Ал үчүн колунда 9-классты бүтүргөнү тууралуу документи болууга тийиш. Кожобековдун маалыматы боюнча, учурда ашпозчулук, ширетүүчүлүк жана тигүүчүлүк кесипке окугандар көбөйгөн.
- Учурда бул кесиптерге талап көп болуп жаткандыктан, окууга кызыккандар да көбөйдү, - деди ал. - Эки жыл мурда биз тигүүчүлүк кесип боюнча дуалдык программаны сыноо иретинде киргизгенбиз. Бул программанын артыкчылыгы - теориялык билимден практикалык билимге көбүрөөк убакыт бөлүнөт.
Айрым депутаттар бүгүнкү талап кылынып жаткан IT технолог, компьютер адиси сыяктуу жана башка кесиптерге үйрөтүүнү көбөйтүүнү сунуштады.
Жогорку Кеңеш бүгүн, 22-майда «Билим берүү жөнүндө» мыйзамга өзгөртүүлөрдү киргизүү тууралуу мыйзам долбоорун карап жатат.
