Украинанын чыгышында 2014-жылдын апрелинен бери 500дөн ашуун кыйноо фактылары катталды. Бул тууралуу Киевде өткөн басма сөз жыйынында Бириккен Улуттар Уюмунун миссиясынын жетекчиси Фиона Фрейзер билдирди.
- Бирок бул айсбергдин үстү жагы гана. Украинада кыйноо маселеси согуш башталгандан бери ого бетер курчуп кетти, - деди ал.
БУУнун өкүлү белгилегендей, көбүнчө кыйноого аскер кызматкерлери кабылууда.
- Украинанын өкмөттүк күчтөрү тарабынан да, Орусия колдогон жикчилдер жактан да кыйноого жана ырайымсыз мамилеге туш болгондор көп, - деди Фрейзер.
2014-жылы Орусия Крымды аннексиялап алгандан кийин Украинанын чыгышында тутанган аскердик чыңалуу токтобой келет. Ошондон бери каза болгон адамдардын саны 40 миңден ашканы буга чейин кабарланган. (RK)
