Пакистандын уруулар жашаган Бажаур аймагында жолго коюлган бомба жарылып, кеминде эки жоокер курман болду. Бул тууралуу жергиликтүү бийлик өкүлдөрү кабарлашты. Бомба жоокерлер машинеде баратканда жарылган. Окуядан дагы төрт аскер жарадар болду.
Бул окуя үчүн пакистандык талибдердин «Техрик-е Талибан» кыймылы жоопкерчилик алды. Алардын урду тилинде тараткан билдирүүсүндө бомба аралыктан башкарылып, жардырылганы айтылат.
27-июлда да уруулар байырлаган Түндүк Вазиристан аймагында талибдердин кол салуусунан алты жоокер каза тапкан. Ушул эле күнү Белужистан провинциясындагы башка бир кагылышта дагы алты жоокер курман болгон.
