Чүй милициясы Кой-Таштагы окуялар учурунда күч түзүмдөрүнүн кызматкерлерин барымтага алды деп шек саналып жаткандардын сүрөтүн жарыялады.
Облустук ички иштер башкармалыгы кабарлаганына караганда, сүрөттөр социалдык түйүндөрдө жарыяланган видеодон алынды. Мекеме ал адамдарды көргөн-билгендер болсо кабарлап коюуну өтүндү.
«Айрымдарын таанып-тактадык, алар мыйзам чегинде жоопко тартылат» деди милиция.
7-августта УКМКнын «Альфа» тобу кримтөбөл Азиз Батукаевдин түрмөдөн мыйзамсыз бошотулушуна байланыштуу мурдагы президент Алмазбек Атамбаевди Кой-Таштагы үйүнөн суракка алып кетүүгө аракет кылган. Атайын кызмат желим октон башка курал колдонулбаганын билдирген.
Атамбаев жашынып калып, анын тарапкерлери «альфачыларды» ур-токмокко алганы кабарланган.
Эртеси күнү Атамбаев алты жоокер анын үйүндө кармалып турганын тастыктап, түштөн кийин алар коё берилген.
Башкы прокуратура Кой-Таштагы окуя боюнча алты фактынын негизинде сотко чейинки өндүрүш башталганын, алардын бири барымтага алуу экенин маалымдаган.
Атамбаев 8-августта кармалды. Азыр ал УКМКда.
Жалпысынан 7-8-августта Кой-Ташта жүздөн ашуун адам жараат алды, алардын бири - атайын кызматтын офицери каза болду. Жабыркагандар арасында Атамбаевдин тарапкерлери да, күч түзүмдөрүнүн кызматкерлери да бар. (RK)
