Ысык-Көлдө кезектеги туристтик фестиваль өттү. Ак-Суу районунун Шахты-Жыргалаң айылында салтка айланган «J-Fest» фестивалын «Жыргалаң» бирикмеси уюштурду.
Бирикменин жетекчиси Гүлмира Примованын айтымында, бул жолку иш-чарага чет өлкөлөрдөн келген 200гө жакын конок катышты.
- Ушуну менен фестивалды үчүнчү жыл өткөрүп жатабыз, - деди ал. - Биздин максат – айылыбызга келген туристтер көбөйтүү, аларды кыргыз элинин салты, үрп-адаты, улуттук тамак-ашы менен тааныштыруу. Айылыбыз жылы бою туристтерди тосот. Быйыл жайында он конок үйү кем дегенде 60-80 чет элдикти тейледи, бул жакшы көрсөткүч.
Фестивалдын жүрүшүндө туристтер тушоо кесүү аземине катышып, көкбөрү, кыз куумай жана башка ат оюндарын көрүштү. Алар турналуу көлгө, Эки-Чат капчыгайына жөө барышты. Веложарыш жана жөө жүрүш мелдештери өткөрүлдү.
1200дөй адам жашаган Шахты-Жыргалаң айылы Каракол шаарынан 70 чакырым жерде жайгашкан. Көмүр шахтасы иштеп турган кезде эле жергиликтүү эл мал чарбачылыгы менен алектенчү.
Айыл өкмөтүнүн башчысы Талгат Мукалаевдин айтымында, туризм багыты 2014-жылдан бери жакшы өнүгүп келе жатат. (KS)
