Казакстандык ыктыярчылар Арыс шаарынын балдарына окуу куралдарын таратып жатышат. Июнда шаар ок-дары сакталган кампадагы жарылуудан жабыркаган. Августтун башында активисттер балдарга жардам берүү боюнча демилге көтөрүп, акча чогултууга киришкен. Активисттердин бири Бэлла Орынбетова өлкөнүн булуң-бурчунан жүздөгөн киши 900 миң тенге (180 миң сом) которгонун айтты. Бул каражатка дептер, калем, рюкзактар алынып, арыстык 300дөй үй-бүлөгө жардам берилди.
24-июнда шаардагы кампада чыккан өрт жарылууга алып келген. 4 киши өлгөн, жүздөгөн адам медициналык жардам сурап кайрылган. Калаа тургундары бир нече күнгө эвакуацияланган. Жергиликтүү бийликтин маалыматы боюнча жарылуудан турак жайлардын 85% жабыркаган, 20дан көп үй өрттөнүп кеткен.
Өкмөт Арысты калыбына келтирүүгө 56,1 миллиард теңге (144,7 миллион доллар) бөлүнүп жатканын билдирген.
