Жалал-Абад облустук клиникалык борбору үчүн 100 орундуу эки кабаттан турган имараттын курулушу башталды. Бейтапкананын башкы дарыгери Кумар Ботокараев билдиргендей, курулушка республикалык бюджеттен 77 млн сом каралган.
- Оорукананын бул имараты кийинки жылдын аягында ишке берилсе, кулак-мурун оорулары, урология жана бет-жаак хирургиясы, көз оорулары бөлүмдөрү ошол жакта жайгашат. Германия өнүктүрүү банкынын эсебинен 3 млн. еврого курулуп жаткан ыкчам медициналык жардам көрсөтүү борбору да жакындан тартып иштей баштайт, - деди Ботокараев.
Курулушту баштап берүү аземине саламаттык сактоо министри Космосбек Чолпонбаев, Жогорку Кеңештин депутаты Айнура Осмонова, жергиликтүү бийлик өкүлдөрү жана оорукана жамааты катышты.
Жалал-Абад облустук клиникалык ооруканасы 1932-жылы салынган. Андагы айрым имараттар 1970-1990-жылдары курулган. 1200дөн ашык медицина кызматкери эмгектенген бейтапкана жыл сайын 30 миңге чукул оорулууларды тейлейт. (RsK\ErN)
