Бүгүн, Күрөш боюнча дүйнө чемпионатынын 6-күнүндө кыз-келиндер күрөшүнөн кыргызстандык балбан Айсулуу Тыныбекова килемге чыгат. Ал 62 килограммга чейинки салмакта күрөшөт.
Тыныбекова мелдешти 1/16 финалдан баштап, алгачкы беттешинде мексикалык Александра Ромеро Баннила менен күч сынашат.
Дүйнө чемпионатында кыз-келиндер арасында өтүп жаткан күрөш боюнча мелдешке Кыргызстандан 4 балбан кыз катышууда. 18-сентябрда Айпери Медет кызы менен Нураида Анаркулова килемге чыгып, мелдешти байгесиз жыйынтыкташты. 17-сентябрда 55 килограммга чейинки салмакта күрөшкөн Мадина Надирова да мелдештен четтеген.
Бүгүн, 19-сентябрда эркин күрөштөн да мелдештер башталды. Кыргызстандын атынан 57 килограммга чейинки салмакта Улукбек Жолдошбеков менен 65 килограммга чейинки салмактагы Нургазы Абдразаков килемге чыгат.
Спорттук күрөш боюнча дүйнө чемпионаты 14-сентябрда башталган. Алгач грек-рим күрөшүнөн мелдештер өтүп, кыргызстандык балбан Атабек Азисбеков 5-орунду ээлеп, 2020-жылы Токиодо өтө турган Олимпиада оюндарына жолдомо утту.
Бул чемпионатта 2020-жылы Токиодо өтө турган Олимп оюндарына катышууга укук берген жолдомолор ойнотулууда. Тактап айтканда грек-рим күрөшү (60, 67, 77, 87, 97 жана 130 кг), эркин күрөш (57, 65, 74, 86, 97 жана 125 кг) жана кыз-келиндер күрөшүнөн (50, 53, 57, 62, 68 жана 76 кг) алты салмак категориясы боюнча алдыңкы беш орунду ээлегендерге жолдомо берилет. Мелдеш 22-сентябрда жыйынтыкталат. (GT)
