Жогорку Кеңештин Эл аралык иштер, коргоо жана коопсуздук боюнча комитетинде бүгүн, 24-сентябрда чек ара маселеси талкууланат.
Комитет жыйынынын күн тартибине парламенттин чек арага байланыштуу мурда чыгарган токтомдорунун жана чечимдеринин аткарылышы тууралуу өкмөттүн маалыматын угуу маселеси кирди.
Депутаттардын суроолоруна вице-премьер-министр Жеңиш Разаков жооп берет.
16-сентябрда Баткендин Максат айылына жакын жерде Кыргызстан менен Тажикстандын чек арачыларынын ортосунда атышуу болгон. Кыргызстандык чек арачы Равшан Муминов курман болуп, 13 адам жаракат алган. Ал эми Тажикстан кыргыз-тажик чек арасындагы атышуудан үч чек арачысы каза болгонун кабарлаган. (RK)
