Пакистандын бийлиги Кашмирдин талаштуу аймагында Индиянын аскерлери менен атышууда эки адам окко учканын, дагы төрт киши жарадар болгонун билдирди. Нью-Дели бул окуя тууралуу азырынча комментарий бере элек.
Эки өлкөнүн жоокерлери Гималай аймагында маал-маалы менен атышып турат. Бирок тирешүү Индия өкмөтү Кашмирди өзгөчө автономия макамынан ажыратарын билдиргенден кийин айрыкча күчөдү.
Өткөн айда Индиянын өкмөтү Баш мыйзамды өзгөртүп, Кашмирдин Нью-Делиге баш ийген бөлүгүнүн атайын макамын жокко чыгарарын жарыялаган. Ага ылайык, негизинен мусулмандар байырлаган Жамму жана Кашмир штаты мурдагыдай өз алдынча иш алып бара албай калат.
Пакистандын премьер-министри Имран Хан Нью-Делинин мындай чечимин кескин айыптаган.
Индия менен Пакистан Кашмирди 1947-жылы Британиянын карамагынан чыккандан кийин бөлүп алган. Өзөктүк куралы бар бул коңшу өлкөлөрдүн ортосундагы үч согуштун экөө ушул Кашмирдин айынан тутанган.
