«Россия инвестициялык банкы» («Росинбанк») «Керемет банк» деген аталыш менен Юстиция министрлигинен кайра каттоодон өттү. Бул тууралуу Улуттук банк кабарлады.
Маалыматка ылайык, 2018-жылы октябрь айында Кыргызстандын Улуттук банкы аталган банктын 71,66 пайыз акциясына ээ болгон. Буга банктын алган насыяларын төлөй албай калганы себеп болгон. Кийинчерээк «Росинбанк» үчүн 3 миллиард сом салып, жалпы акциясынын 95 пайызына ээлик кылып калган.
2019-жылы Улуттук банк «Росинбанкты» инфратүзүм, байланыш жана турак жай куруу жаатында насыя берүүгө адистештирүү жөнүндө чечим кабыл алган.
Кезинде өлкөдөгү эң ири банктардын бири болуп саналган «Азия Универсал банк» 2010-жылдан кийин мамлекеттин карамагына өткөрүлүп, «Залкар Банк» болуп кайра түзүлгөн. Кийин анын 90 пайыз акциясын орусиялык «Инвестторгбанк» сатып алып, 2013-жылы «Росинбанк» ачылган. Өлкө аймагында анын 30га жакын кеңсеси бар. (BkA)
