АКШнын президенти Дональд Трампка карата импичмент маселеси Өкүлдөр палатасында иликтенип жаткан кезде президенттин Украинага аскердик жардам берүүдөн баш тартуу боюнча чечимин мамлекеттик катчы коргоп чыкты. Майк Помпео 18-ноябрдагы басма сөз жыйынында президент Трамп Украинага курал берүү боюнча Обама администрациясынын аракетин жокко чыгарганын билдирди.
- Мен биздин кылганыбыз менен сыймыктанам. Президент Трамптын саясаты ар тарабынан туура болгон. Мамлекеттик департамент аны толук колдойт, - деди Помпео.
АКШнын президенти Дональд Трамптын украин президенти менен 25-июлда телефон аркылуу сүйлөшүүсүнүн алдында Украинага 400 млн. долларлык курал берүүдөн баш тарткан чечими анын импичменти тууралуу талкуулардын негизин түзөт.
Өткөн аптада АКШ Конгресси президент Дональд Трампка импичмент жарыялоо маселеси боюнча коомдук талкууну баштаган. Демократтар америкалыктарга республикачыл Трамп шайлоо жараянына Украинаны аралаштырууга аракет кылганын далилдеп берүүнү көздөп жатышат.
Республикачылар импичмент аракетин бюрократтардын кутуму деп баалашууда.
