Украиналыктар Сталиндин бийлиги учурундагы Голодомор деп аталган ачарчылыктын 86 жылдыгын белгилешти. Уюштуруучулар элди 23-ноябрь күнү жергиликтүү убакыт менен 16:00дө терезелердин текчесине шам коюуга чакырышты.
Совет бийлигинин 30-жылдардагы катаал саясатынан улам миллиондогон адам ачарчылыктан набыт болушкан. Өкмөт украиналык дыйкандардын түшүмүн жана азык-түлүгүн тартып алып, жамааттык чарбаларга кирүүгө мажбурлаган. Анын кесепетинен 3-7 миллион адам кырылганы айтылып жүрөт.
Украинада жыл сайын ноябрдын төртүнчү ишембисинде ошол кезде жашоо менен кош айтышкандар эскерилет. Элдин көбү ал трагедияны фермерлерди кырып жок кылууга багытталган геноцид катары мүнөздөшөт.
