Линктер

ЧУКУЛ КАБАР!
ишемби, 18-январь, 2020 Бишкек убактысы 12:46

Гонконгдо демонстранттар менен полиция кагылышты


Гонконгдо 24-ноябрда райондук кеңештерге шайлоо болгондон бери нааразылык акциясы өтө элек болчу.

Гонконгдо 1-декабрга караган түнү өкмөткө каршы нааразылык акциясына чыккандар менен полиция кагылышты. Полиция көчөгө чыккандарды кууп таратуу үчүн жаш агызган газ пайдаланды жана тоз-тополоңдо үч адам жабыркаганы белгилүү болду. Бул өткөн айдын аягында жергиликтүү кеңештерге өткөн шайлоодон берки алгачкы калайман нааразылык акциясы болуп калды.

Шаардын борборунда нааразылык акциясына чогулгандар полициядан көздөн жаш агызган газ колдонбоону талап кылды. Ишембидеги каршылык акциясына чыккандарга ардагерлер менен окуучулар да кошулду.

Демонстранттар АКШга Гонконгдогу демократияны жана адам укугун кодоого багытталган мыйзам кабыл алганы үчүн ыраазычылык билдиришти.

Гонконгдо 24-ноябрда 18 райондук кеңеште шайлоо өтүп, анда демократиялык күчтөрдүн өкүлдөрү 452 орундун 396сын, тактап айтканда дээрлик 90 пайызын жеңип алган. Муну оппозиция өзүнүн жеңиши катары сыпаттаган. Мандат алгандардын катарында бир канча айдан бери Гонконгдогу бийликке каршы калайман нааразылык акцияларын уюштурган лидерлер да болгон.

Гонконгдо бир канча айдан бери миңдеген адамдарды көчөгө чыгарган нааразылыкка кылмышка шектүүлөрдү Кытайга өткөрүп берүүгө жол ачкан мыйзам долбоору себеп болгон. Кийин жаңжалдын башкы себепкери болгон бул документти шаар жетекчилиги парламенттен биротоло кайтарып алган. Бирок демонстранттар Бээжиндин саясатынан чыкпаган жетекчилердин иштен кетишин, нааразылык акцияларында камалгандардын бошотулушун, ашкере күч колдонгон полиция кызматкерлеринин жазаланышын талап кылып жатышат.

XS
SM
MD
LG