Линктер

ЧУКУЛ КАБАР!
12-Май, 2021 шаршемби, Бишкек убактысы 09:15

Токтакунова: Зилалиевдин иши сотто кайра башынан каралат


Дүйшөнбек Зилалиев сот залында. 2019-жылдын август айы.

Мурдагы вице-премьер-министр Дүйшөнбек Зилалиевдин жактоочусу Таалайгүл Токтакунова Зилалиевдин иши сотто кайра башынан карала турганын билдирди. Ал буга Бишкектин Биринчи май райондук сотунда мурдагы вице-премьер-министрдин ишин карап жаткан судьянын алмашканы негиз болгонун айтты.

- Мыйзамдын талабы ушундай. Ишти карай турган жаңы судья иштин жагдайын билиши керек да. Ал сотто мурда көрсөтмө бергендердин көрсөтмөсүн окуп коё албайт. Ошондуктан ишти кароо кайра башынан башталышы керек, - деди Токтакунова.

Анын маалыматы боюнча, сотко төрагалык кылып жаткан судья Алмаз Койлубаев Чүй облустук сотунан Биринчи май райондук сотуна убактылуу которулган. Ал кайра облустук сотко кетти. Ал эми Зилалиевдин ишин райондук соттун жаңы судьясы Адылбек Эсенбаев карай баштайт. Жараян 11-декабрга белгиленген. Бул боюнча райондук сот маалымат бере элек.

Токтакунованын айтымында, Зилалиевдин иши боюнча күбөлөрдүн 70 пайызы суралып бүткөн.

Кыргызстандын Башкы прокуратурасы Зилалиевге, 2010-2017-жылдары мамлекеттик органдарда жетекчилик кызматты ээлеп турган учурунда, өзү иштеп тапкан каражаттан ашык суммага мүлк сатып алганы үчүн «Мыйзамсыз баюу» беренесинин негизинде кылмыш ишин козгогон. Ал 2018-жылдын 8-декабрында камакка алынып, азыр УКМКнын тергөө абагында кармалып турат.

Быйыл августта тоо-кен тармагындагы лицензия берүү маселеси боюнча Зилалиевге карата «Коррупция» беренеси менен дагы бир жаңы иш козголгон. Зилалиев өзүнө коюлган айыпты четке кагып, «мыйзамсыз түрдө камалганын» айтып келет. (BTo)

Пикирлерди көрүңүз (6)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG