Казакстандын Орусиядагы элчиси Имангали Тасмагамбетов «пенсия курагына жеткендиктен» кызматынан бошотулду. Бул тууралуу шаршембиде казак президентинин кеңсеси билдирди.
Тасмагамбетов 9-декабрда 63 жашка толду. Нурсултан Назарбаевдин эски үзөңгүлөшү, ар кайсы жылдарда премьер-министр, коргоо министри, ал кездеги борбор шаар Алматынын акими, администрация башчысы кызматтарын ээлеген. Москвага элчи болуп 2017-жылдын башында дайындалган. Жетекчини Назарбаевдин ыктымал мураскери деп атап жүрүштү. Бирок мартта кызматынан кеткенде президент башка жакын адамы Касым-Жомарт Токаевди бийликке алып келди.
Тасмагамбетовдун аты бир катар жаңжалдарга байланыштуу аталып жүрдү. Күйөө баласы Кенес Ракившевдин байлыгын казакстандык "Forbes" журналы 610 миллион долларга баалаган.
