Кыргыз өкмөтү коронавируска байланыштуу жабылган ишкана ээлерине салык жана насыялык каникул берүү жолдорун карап жатат.
Бул тууралуу вице-премьер-министр Алтынай Өмүрбекова 17-мартта уюштурган маалымат жыйында билдирди.
“Экономикалык суроолор боюнча штабда салык жана насыя боюнча каникул берүү каралып жатат. Мунун баары индивидуалдык тартипте каралат”, - деди Өмүрбекова.
Кыргызстанда коронавирустун жайылышын алдын алуу максатында бардык түнкү клуб, кинотеатр, компьютердик клубдар жабылган.
17-мартта тейлөөсү 50 орундан ашкан бардык коомдук жайларга, той, куран окутуу сыяктуу массалык иш-чараларга үч жумалык тыюу салынганы белгилүү болду. (TSh)
