20-мартта Казакстандын экс-президенти Нурсултан Назарбаев коронавируска байланыштуу элине кайрылды. Ал азыркы көрүнүштү 1990-жылдардын башындагы оор мезгилге салыштырды.
Назарбаев казак экономикасы менен улуттук валютасы дагы көбүрөөк алсырашы мүмкүн экенин четке каккан жок.
«Азыркы кризис узагыраак убакытка созула турган болсо, өкмөт ага каршы чара көрүүгө тийиш. Андай жагдайда өлкөнү жана жарандарды катаал үнөмгө жана туруктуу өнүгүү багытына өтүүгө даярдоо маанилүү», - деди Назарбаев.
Ал ошондой эле казакстандыктарды президент Касым-Жомарт Токаевди, өкмөттү колдоого, коронавируска каршы күрөшкө салым кошууга чакырды.
