Облустун аймагындагы трассада негизинен Бишкек-Ош жолунун Чычкан капчыгайында санитардык пост иштеп жатат. Өкмөттүн Жалал-Абад облусундагы ыйгарым укуктуу өкүлү Нурболот Мирзахмедов “Азаттыкка” билдиргендей, республикалык штабга дагы эки жерге санитардык пост коюу сунушталды. Алар Чаткал-Талас жана Казарман-Нарын жолуна коюлат.
"Райондун, шаарлардын ичинде да жергиликтүү элдин сунушу менен 58 блокпост коюлган. Ал жерде милиция жана элдик кошуун чогуу иштеп жатат. Кирип чыккан автоунаалар дезинфекцияланып жатат", – деди Мирзахмедов.
Сузак районунда коронавирус аныкталган үч адам жашаган үч айыл 18-марттан тартып карантинге алынган. 21-мартта да райондогу төрт айылга ушундай эле эреже киргизилген. Учурда Сузак районунда бул илдетти жугузуп алгандардын саны сегизге жетти.
Өкмөт 22-марттан тарта өлкөгө бир айлык өзгөчө кырдаал жарыялады. Анын шарттарына ылайык адамдар жашаган аймактан сыртка чыгууга чектөө киргизилди. Азык-түлүк, дары-дармек жана тиричиликке зарыл товарларды ташыган ишкерлерге тоскоолдук болбойт. (RsK)
