Өлкөдөгү эпидемиологиялык кырдаалга байланыштуу мектептерде IV чейректи окутуу 8-апрелден тартып онлайн жүргүзүлөт. Буга байланыштуу Билим берүү жана илим министрлиги 210 мугалимдин катышуусу менен видеосабактарды жүргүзөт.
Министрлик ЭлТР телеканалынан 8-11-апрель күндөрү 5-11-класстар үчүн жүргүзүлүүчү онлайн сабактардын жадыбалын жарыялады. Жадыбал Билим берүү жана илим министрлигинин, шаардык жана аймактык билим берүү башкармалыктарынын сайттарына илинди.
8-апрелден тартып бала бакчалардын тарбиялануучулары жана кенже класстагы окуучулары үчүн «Баластан» каналы аркылуу телесабактар уюштурулат. Ал эми 5-класстан жогорку окуучулар үчүн ЭлТРдин «Илим, билим», «Санат» телеканалы аркылуу телесабактар берилет.
Мындан сырткары мугалимдер окуучулар менен «Zoom», «WhatsApp» тиркемелери аркылуу байланышып, тапшырмаларды текшерип турушат. (ZKo)
