Жалал-Абад шаарындагы жугуштуу илдеттерди дарылоочу оорукана убактылуу жабылды. Бул тууралуу 8-апрелде саламаттык сактоо министри Сабиржан Абдикаримов билдирди.
Анын айтымында, буга мекеменин кызматкерлери коронавируска чалдыкканы себеп болду.
«Жалал-Абад шаарындагы жугуштуу илдеттер ооруканасынын бардык кызматкерлери коронавируска чалдыкканы аныкталды. Ошондуктан бүгүн биз бул оорукананы жаап, дезинфекцияга жиберебиз да, Ош облус аралык оорукананын бир корпусун бошотуп, орун даярдайбыз», - деди ал.
Министр кошумчалагандай, оорукананын кызматкерлери үй карантинине алынды, алар менен контактта болгондор обсервацияда.
8-апрелге карата Кыргызстанда бул илдет жуккандардын саны 270, алардын төртөө каза болду, 25и айыгып чыкты.
25-марттан 15-апрелге чейин коронавируска байланыштуу Бишкек, Ош жана Жалал-Абад шаарларынын, Ош облусунун Ноокат, Кара-Суу райондорунун, ошондой эле Жалал-Абад облусунун Сузак районунун аймактарына өзгөчө абал киргизилген. (RK)
