Кыргызстанда мамлекеттик юридикалык жардамдын жол-жобосу жазылган мыйзамга кошумча киргизүү тууралуу долбоор иштелип чыкты. Коомдук талкууга коюлган мыйзам долбоорунун автору - Жогорку Кеңештин депутаты Асел Кодуранова.
Ал жарандарга мамлекеттин эсебинен юридикалык жардамды айрым категориядагы жарандык жана административдик иштер боюнча да көрсөтүү мүмкүнчүлүгүн берүүнү сунуш кылууда.
Мыйзам долбоорунун негиздемесинде: «Мамлекет кепилдик берген юридикалык жардамды координациялоо боюнча райондук бюролорду түзүү алгачкы консультациялык-укуктук жардам көрсөтүш үчүн керектүү чара болуп саналат. Кепилдик берилген юридикалык жардамга укуктуу жактардын тизмесине качкындар жана үй-бүлө зомбулугунан жабыр тарткандар киргизилет» деп айтылат.
Азыркы мыйзамдар боюнча муктаж адамдарга мамлекеттин эсебинен адвокаттык жардам жазык иштери боюнча гана берилет. (RK)
