Эки айлык карантинден соң 4-майдан тарта 4 миллионго чукул италиялыктар ишине кайтат. 4-майдан тарта заводдор, парктар жана курулуш жайлары иштей баштайт. Жарандарга чакан сандагы тууган-туушкандары менен жолугушууга мүмкүнчүлүк берилет.
18-майдан тартып соода жайлары, музейлер менен китепканалар, 1-июндан баштап бар-ресторандар жана сулуулук салондору ишке кирет. Бирок мектептер сентябрдын аягына чейин жабык болот.
Италиянын премьер-министри Жузеппе Конте 1-майда сүйлөгөн сөзүндө коронавирус пандемиясынан улам, өлкөдө түзүлгөн экономикалык кыйынчылыктар үчүн элинен кечирим сурады. Коронавирусту жайылтпоо аракети менен жарыяланган карантинден улам өлкөнүн экономикасы 8% кыскарары айтылган. Конте мамлекет тарабынан аз камсыз болгон үй-бүлөлөргө берилчү жардам кечиктирилгенин мойнуна алды.
Италия Европа өлкөлөрүнүн ичинен акыркылардан болуп, экономикасын жандандырууга киришүүдө.
9-марттан бери карантин шартында жашап жаткан Италия коронавирустан каза тапкандардын саны боюнча Европада башкы сапта турат. Бул өлкөдө COVID-19 илдети 197 минден көп адамга жугуп, 28 миңден ашуун бейтап каза тапты. Италиянын бийлиги коронавирустан көз жумгандар март айынын башындагы деңгээлге чейин азайып калганын билдирүүдө.
Италия кадимки жашоого кайта баштайт
