Ош мамлекеттик университети быйылкы 80 жылдык мааракесин онлайн форматта өткөрүүгө камынып жатат. Университеттин басма сөз кызматынын маалыматына караганда, иш-чара 28-майга пландалууда.
Онлайн жыйынга билим берүү жана илим министри Каныбек Исаков, Ош шаарынын мэри Таалайбек Сарыбашов, өкмөттүн Ош облусундагы ыйгарым укуктуу өкүлү Узарбек Жылкыбаев жана ОшМУнун профессордук-окутуучулук жамааты, студенттер аралыктан катышат.
Иш-чаранын жүрүшүндө Орусиянын Түштүк Урал мамлекеттик университети менен ОшМУнун биргелешкен кыргыз-орус факультетин ачуу жөнүндөгү келишимге кол коюлат.
Мааракенин алкагында «Аймактарды өнүктүрүү жана өлкөнү санариптештирүү шартындагы билим берүү менен илимдин актуалдуу маселелери» деген темада эл аралык илимий-практикалык онлайн конференция уюштурулат.
Майрамдык иш-чара концерт менен жыйынтыкталат.
ОшМУда 19 факультетте 35 миң студент билим алат. Алардын жети миңдейи чет өлкөлүктөр.
Коронавируска байланыштуу Кыргызстандын көпчүлүк аймактарында өзгөчө кырдаал режими күчүндө турат. Окуу жайларынын баары карантинге жабылган. (RK)
