Бишкекте мурдагы тышкы иштер министри, мурдагы маданият министри Күлүйпа Кондучалованын 100 жылдыгына арналган "Күлүйпа Кондучалова жана кыргыз маданияты" аттуу жумалыктын ачылышы болуп өттү.
9-июнда Алыкул Осмонов атындагы улуттук китепканада өткөн бул иш-чара менен катар атайын даярдалган китеп көргөзмөсүнүн да ачылышы болду.
Иш-чарага маданият, маалымат жана туризм министринин орун басары Кайрат Иманалиев, Кондучалованын кызы, Кыргызстандын Индиядагы мурдагы элчиси Ирина Оролбаева, өлкөнүн маданиятына эмгек сиңирген ишмер Мундузбек Тентимишев катышты.
8-июндан тартып Кондучалованын кыргыз адабиятын, театрын, кино, балет жана опера искусствосун, музыкасын, сүрөт өнөрүн жана музей тармагын өнүктүрүүгө кошкон салымы тууралуу баяндаган иш-чаралар өткөрүлүп, ишмердин туулган күнү – 15-июнда Эскерүү күнү менен жыйынтыкталат.
Кыргыз эл баатыры, республиканын маданиятына эмгек сиңирген мамлекеттик жана коомдук ишмер Күлүйпа Кондучалова 1920-жылы 15-июнда туулган, 2013-жылы 7-сентябрда 93 жаш курагында көз жумган. Ал 1958-жылдан тартып 22 жыл бою Кыргызстандын Маданият министрлигин жетектеген. 1953-1963-жылдары тышкы иштер министри болгон. (RK)
