Орусиянын Борбордук шайлоо комиссиясы Баш мыйзамды өзгөртүү боюнча добуш берүүнүн баштапкы жыйынтыгын жарыялады. Ага ылайык, протоколдордун 100% саналгандан кийин добуш бергендердин 77,92% Конституцияга өзгөртүүлөрдү киргизүүнү колдоду.
Добуш берген жарандар жалпы шайлоочулардын дээрлик 65% түздү.
Конституцияны өзгөртүүнү колдогондордун саны боюнча Чеченстан озуп чыкты. Бул өлкөдө мындай көрсөткүч 97,92% жетти. Ненец автоном окуругунда тескерисинче референдумда бийликтин сунушун колдобогондор көпчүлүктү түздү жана бул аймакта добуш бергендердин теңинен көбү өзгөртүүлөргө каршы экенин билдиришти.
Орусияда Баш мыйзамды өзгөртүү боюнча добуш берүү 25-июндан 1-июлга чейин өттү.
Конституцияга киргизилген өзгөртүүлөрдүн эң негизгиси - президент Владимир Путиндин кызматтык мөөнөттөрүн жокко чыгарган жана ага кийинки шайлоого катышууга жол ачкан жобо болуп саналат.
Владимир Путин ушул жылдын башында Баш мыйзамга өзгөртүү киргизүүнү сунуш кылган жана жалпы элдик референдум алгач 22-апрелге белгиленген. Бирок коронавирустан улам анын мөөнөтү кийинкиге жылган. Өлкөдөгү оппозиция лидерлери, айрым жарандык активисттер бул референдумду Путиндин бийликте көбүрөк калуу айла-амалы катары сынга алып, жарандарды добуш берүүдөн баш тартууга чакырып келишкен.
