Линктер

ЧУКУЛ КАБАР!
15-август, 2020 ишемби, Бишкек убактысы 22:32

Пандемия башталгандан бери чет өлкөлөрдөн 20 638 кыргызстандык кайтарылды


Нуран Ниязалиев, тышкы иштер министринин орун басары.

Коронавирус инфекциясы жайылган учурдан тартып, февраль айынан 6-июлга чейин учак жана автобустар менен 20 миң 638 кыргызстандык жаран мекенине кайтарылды. Бул маалыматты тышкы иштер министринин орун басары Нуран Ниязалиев бүгүн, 7-июлда брифингде билдирди. Анын айтымында, кайтып келгендердин басымдуу бөлүгү Орусиядан, Кытайдан, Түркиядан жана Бириккен Араб Эмираттарынан жеткирилген.

Нуран Ниязалиев бүгүнкү күнү да 57 чет мамлекеттен 7812 жаран Кыргызстанга кайтууну көздөп, элчиликтерге жана консулдуктарга кайрылганын кошумчалады. Булардын ичинен басымдуу бөлүгү - Орусиядагы кыргызстандыктар.

«Коронавирус пандемиясы учурундагы карантиндик чараларга жана Казакстан аркылуу өтүүгө тыюу салынганына карабай, биздин жарандар Орусиянын Оренбург облусундагы Соль-Илецк шаарында орус-казак чек арасына топтолуп жатышат. Казакстан менен Кыргызстандын президенттеринин сүйлөшүүлөрүнүн негизинде Казакстан аймагы аркылуу үч жолу транзиттик коридор уюштурулду», - деп билдирди ал.

Тышкы иштер министринин орун басары Орусиядагы кыргызстандыктардан орус-казак чек арасы ачылганга чейин аймакка барбай турууну өтүндү.

Кыргызстан коронавирус инфекциясынын жайылышына жол бербөө максатында 20-марттан тартып эл аралык каттамдарды жапкан. Андан бери чет жактардагы кыргызстандыктарды Бишкек жана Ош шаарларына жеткирген жүзгө жакын чартердик каттам уюштурулган. Орусиянын Оренбург жана Самара облустарынан 52 автобус менен 1,5 миңге жакын кыргызстандык жаран алынып келген. (ZKo)

XS
SM
MD
LG