Облустук казыятка мечиттердеги жума намаздарды токтотуу сунушталды. Бул тууралуу «Азаттыкка» өкмөттүн Ош облусундагы өкүлчүлүгүнүн басма сөз катчысы Нуркыз Кадырбекова билдирди.
Андан алынган маалыматка караганда, мындан тышкары облус аралык каттамдар 10-июлдан тартып токтотулат. Санитардык-карантиндик посттордун иши күчөтүлөт.
Облус аймагындагы базарлар дүйшөмбү жана бейшемби күндөрү иштебейт, дезинфекцияланат.
Эс алуучу жайларда, жаратылышта ар кандай иш-чаралардын, аш-тойлордун өткөрүлүшүнө тыюу салынат. Жарандардын жаратылышка эс алууга чыгышына да уруксат берилбейт.
Мындан тышкары той-мааракелерди өткөрбөө боюнча чектөөлөргө баш ийбегендерге, дары-дармек менен азык-түлүктүн баасын көтөргөндөргө катуу чара көрүлөт.
8-июлга карата Кыргызстанда коронавирус илдетине чалдыккан 345 адам аныкталды. Ооруга чалдыккандардын жалпы саны 8,5 миңге чамалады. Оорудан 112 киши көз жумду.
Ал эми Ош облусунда жалпы оору жуккандардын саны – 586 адам. (ZKo)
