Казакстандын саламаттык сактоо министри Алексей Цой бул былтыркы жылдын ушул маалына карганда 3,3 эсеге көп экенин билдирди. Ага ылайык, жыл башынан тартып 15-июлга чейин өпкөсү кагынган 3327 бейтап көз жумду. Буга чейинки расмий маалыматта пневмониядан 1772 адам ажал тапты, жалпысынан бул оору 98 миңден ашык адамдан аныкталганы эсептелип жаткан болчу.
Алексей Цой 1-августтан тартып Казакстан коронавирус жана пневмония болуп ооругандарды чогуу эсептей турганын билдирди. Ал 17-июлда мындай чечим Дүйнөлүк саламаттык сактоо уюмунун өкүлдөрү менен кеңешкенден кийин кабыл алынганын айтты.
Мунун алдында казак президенти Касым-Жомарт Токаев өкмөткө коронавируска кабылгандарды жана пневмония менен ооруп жаткандардын статистикасы боюнча бир чечимге келүүнү тапшырган.
Расмий статистика боюнча Казакстанда COVID-19ду 66,8 миңдей адам жуктуруп алып, 396 бейтап көз жумду.
