Жекшембиде Минск шаарында президенттикке талапкер Светлана Тихановская алгачкы үгүт митингин уюштурду. Ар кандай маалымат булактарына ылайык, акцияга төрт миңден жети миңге чейин киши катышты.
Митингге Тихановская менен кошо расмий каттоодон өтпөй калган оппозициячыл талапкер Виктор Бабариконун штабынын өкүлдөрү жана дагы бир каттоодон өтпөй калган талапкер Валерий Цепкалонун аялы катышты. Вероника Цепкало Германия, Чехия жана Украина сыяктуу башка мамлекеттерде IT тармагында иштеген эки жүздөн ашык адам шайлоодогу добуш саноодогу фальсификацияны азайтууга жардам бериши керек деп билдирди.
Журналисттер митингди түз эфирде чагылдыра алышкан жок. Анткени "Ынтымак" паркынын аймагында акция өтүп жатканда маалда ал жерде интернет иштебей калды. Өткөн жумада Светлана Тихановскаянын штабы менен расмий каттоодон өтпөй калган "Белгазпромбанктын" мурдагы башчысы Виктор Бабарико жана Жогорку технологиялар паркын негиздеген Валерий Цепкалонун штабдары бириккен.
Тихановская күйөөсү, блогер Сергей Тихановскийди колдоо үчүн шайлоого баратканын билдирген. Президенттик жарышка чыгууну каалаган Сергей Тихановский май айынын аягында камакка алынып, азыркыга чейин тергөө абагында жатат.
Бабарико да уулу менен учурда камакта. Аларга арам акчаны адалдаштырган, пара алган, салык төлөөдөн качкан деген сыяктуу бир нече айыптар коюлган. Мурдагы банкир булардын бардыгын четке кагууда. Ал бул жолку шайлоодо Лукашенконун негизги атаандашы болору айтылып жаткан.
Беларуста президенттик шайлоо 9-августта өтөт. Беларустун Борбордук шайлоо комиссиясы 14-июлда азыркы президент Александр Лукашенко баштаган беш адамды - Светлана Тихановскаяны, Андрей Дмитриевди, Анна Канопацкаяны, Сергей Череченди каттаган.
Өлкөнү 1994-жылдан бери башкарган 65 жаштагы Лукашенконун маалындагы шайлоолор бир да жолу эркин жана таза өттү деп таанылган эмес. Эл аралык байкоочулар Беларуста шайлоо административдик ресурсту колдонуу, оппозицияны куугунтуктоо менен өтөрүн белгилеп жүрүшөт.
Беларуста бул жолку үгүт кампаниясы массалык акциялар менен коштолуп жатат. Лукашенкого каршы чыккан акцияларда ушул күнгө чейин баш аягы 700дөн ашык киши кармалды. Лукашенко оппненттеринин камалышын “башаламандыктарды алдын алуу” деп сыпаттап келатат. Ал шайлоого кийлигишүүдө деп чет мамлекеттерди жана анын ичинде Орусияны дагы айыптаган. (TSh)
