Линктер

ЧУКУЛ КАБАР!
29-октябрь, 2020 бейшемби, Бишкек убактысы 07:18

Адвокат: Илмияновдун жатак абакка которулганы тууралуу кабарым жок


Икрамжан Илмиянов сот жараянында отурган кези. 30-октябрь, 2019-жыл

Мурдагы президент Алмазбек Атамбаевдин кеңешчиси Икрамжан Илмияновдун жатак абакка которулгандыгы тууралуу кабары жок экенин анын адвокаты Кубанычбек Ташбалтаев “Азаттыкка” билдирди:

“Менде мындай маалымат жок. Икрамжан Илмияновго карата шаардык соттун чечими чыккан соң, ал жаза мөөнөтүн өтөө үчүн Бишкектеги №47-абакка которулган”.

Буга чейин Президенттик аппараттын башчысынын мурдагы орун басары Икрамжан Илмиянов жатак абакка которулганы тууралуу маалыматты vb.kg сайты өз булактарына таянып жазып чыкты. Бул тууралуу “Азаттыктын” атын атагысы келбеген булагы да кабарлаган.

Маалыматка караганда, Кылмыш кодексинин "өзгөчө ири өлчөмдө жасалган алдамчылык" беренеси боюнча кесилген Илмиянов жазасын өтөп жаткан №47 түрмөдөн жатак абакка 21-июлда которулган.

Жаза аткаруу кызматынын басма сөз катчылыгы бул маалыматты кийинчерээк тактап берерин билдирди.

2019-жылы 30-октябрда Бишкектин Октябрь райондук соту Икрамжан Илмияновду жети жылга кесип, 1600 эсептик көрсөткүчтө (160 миң сомдун тегереги) айып салуу, үй-мүлкүн конфискациялоо өкүмүн чыгарган. Ал Жазык кодексинин 204-беренесинин 3-бөлүмү («Өзгөчө ири өлчөмдө жасалган алдамчылык») менен күнөөлүү деп табылган. Илмиянов акыркы сөзүн сүйлөгөндө күнөөсү далилденбегенин айткан.

Быйыл 19-июнда бул ишти Бишкек шаардык соту карап, анын жаза мөөнөтүн 1 жыл 6 айга кыскарткан болчу. Мунун жыйынтыгында Икрамжан Илмияновдун жазасы 5 жыл 6 айды түзүп калган.

2018-жылдан бери убактылуу кармоочу жайда олтурган ар бир күнү эки күндөн эсептелет. Мурдагы президент Алмазбек Атамбаевдин эң ишенимдүү адамдарынын бири катары аты чыккан Икрамжан Илмиянов 2018-жылдын 20-октябрында Орусиядан кармалып, Кыргызстанга жеткирилгенин Улуттук коопсуздук боюнча мамлекетик комитет (УКМК) кабарлаган.

Башкы прокуратура ага карата «жеке компаниялардын биринен 150 миң доллар акча алган» деген айып койгон.(BkA)

Пикирлерди көрүңүз (9)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG