Латвиянын бийлиги өзбекстандык, жарандыгы жок Абдрэшид Кушаевди кайрадан Эстонияга өткөрүп берди. Бул тууралуу Кушаев өзү «Азаттыкка» кабарлады. Эстонияда ал социалдык мейманканага киргизилген. Мейманканада саат кечки 19:00дөн таңкы саат 8:00ге чейин калса болорун, күнүнө бир маал жергиликтүү чиркөөдөн тамактанарын жана азык-түлүк менен камсыз болгонун билдирди. Жумасына бир жолу аймактык полицияга барып, каттоодон өтүп турууга тийиш.
Кушаев Латвияга Эстониядан 7-июлда качып барган. Латыш чек арачылары аны жабык лагерге жайгаштырышкан. Эстон бийлиги өзүн мекенине – Өзбекстанга өткөрүп берет деп чочулап, Латвияга качкан Кушаев ал жакта жарандыгы жок адам – «апатрид» макамын алууга үмүттөнүп жүргөн. Бирок сот аны кайрадан Эстонияга кайтарды.
Кушаев 2015-жылы мартта Өзбекстандан качып чыгып, Казакстан жана Орусия аркылуу Эстонияга барган. 2017-жылдын күз айынан тартып, 2020-жылдын 17-июнуна чейин Европанын бир катар өлкөлөрүндө жашаган. Ал СССРдин паспортун өзбек паспортуна алмаштыра албай, жоготуп алгандан бери башка өлкөнүн жарандыгын алган эмес.
