Билим берүү жана илим министрлиги медициналык багыт боюнча билим алуучулар үчүн кошумча 90 гранттык орун бөлдү. Анын ичинен «Дарылоо иши» адистигине 70, «Медициналык-профилактикалык иш» адистигине 20 орун каралган. Мекеме токтом пандемия шартында медициналык адистиктерге болгон муктаждыкты эске алуу менен кабыл алынганын билдирди. Гранттык орундар бөлүнгөн жогорку окуу жайлары:
Кыргыз мамлекеттик медициналык академиясы: «Дарылоо иши» адистиги – 25, «Медициналык-профилактикалык иш» адистиги – 10.
Кыргыз-Орус (Славян) университети: «Дарылоо иши» адистиги – 20.
Ош мамлекеттик университети: «Дарылоо иши» адистиги – 25, «Медициналык-профилактикалык иш» адистиги – 10.
Кошумча гранттык орундар төмөнкү адистиктерге бөлүндү: эпидемиолог, инфекционист, пульмонолог, вирусолог, реаниматолог. Студенттер бакалавриатты аяктаган соң жогорудагы багыт боюнча ординатурада окуусун улантышы керек.
Кошумча гранттык орундарга абитуриенттерди тандоо жана кабыл алуу үчүн кошумча тур 22-августтан 26-августка чейин болот. Сынакка катышуу үчүн абитуриенттер https://2020.edu.gov.kg сайтына катталышы керек.
Пандемияда Кыргызстанда медицина кызматкерлери жетишсиз экени байкалды. Оору эң көп катталган июль айында ыктыярчылар бейтаптарды өз алдынча караган учурлар болду. (BTo)
