Линктер

ЧУКУЛ КАБАР!
26-Январь, 2021 шейшемби, Бишкек убактысы 08:24

Партия өкүлдөрү, жарандык активисттер БШКнын алдына чогулууда


Борбордук шайлоо комиссиясынын имаратынын алдына чогулгандар. 25-август, 2020-жыл.

25-августта эртең менен Борбордук шайлоо комиссиясынын (БШК) имаратынын алдына айрым саясий партия өкүлдөрү, жарандык активисттер чогулууда. Алар «Кыргызстан» саясий партиясына байланыштуу БШКнын жетекчилиги менен жолукканы жатышат.

25-августка караган түнү да БШКда шайлоого ат салышкан партиялардын өкүлдөрү, жарандык активисттер жана журналисттер чогулуп, БШК жетекчилигинен «Кыргызстан» партиясы саат канчада талапкерлеринин тизмесин өткөргөнүн так көрсөтүүнү талап кылышкан.

Аларды БШКнын төрайымы Нуржан Шайлдабекова кабыл алып, топтолгондорго имараттын кире беришинде коюлган камерадан алынган видео жана партиялардан келген документтерди каттоо журналы көрсөтүлгөн.

Камерадан алынган видеодогу убакытка караганда «Кыргызстан» партиясынын өкүлдөрү документтерди мыйзамда белгиленген сааттан кеч алып киришкен.

Ошондой эле партиялардан келген документтерди каттаган журналда дагы «Кыргызстан» партиясы тапшырган убактысы кол менен оңдолуп, саат 17.59 деп жазылганы көрсөтүлдү. БШКнын мүчөсү видеокамеранын сааты 13 мүнөт алдыда экенин айтты.

БШК Жогорку Кеңешке шайлоого бара турган партиялардан талапкерлердин тизмесин жана тийиштүү документтерди кабыл алууну эрежеге ылайык, 24-августта саат 18:00дө токтотот.

Шайлдабекова маселени БШКнын жумушчу тобу 24 сааттын ичинде карап чыгарын маалымдаган.

24-августта саат 18:20да БШКнын басма сөз кызматы 17 партиянын тизмесин тапшырганын жарыялаган, алардын катарында «Кыргызстан» партиясы да аталган.

Көп өтпөй социалдык тармактарда «Кыргызстан» партиясы документтерин мыйзамда белгиленген убакыттан кеч алып барып, маселени жең ичинен чечүүгө аракет кылып жатканы тууралуу маалымат тараган.

Аталган партиянын өкүлү Нурбек Алимбеков жана БШКнын мүчөсү Кайрат Осмоналиев бул маалымат чындыкка дал келбей турганын билдиришкен. Учурда партия абал боюнча журналисттерге басма сөз жыйынын өткөрүп жатат.

Кыргызстанда парламенттик шайлоо 4-октябрда өтөт. БШК 4-сентябрга чейин талапкерлер тууралуу маалыматтарды текшерип, анан бир айлык үгүт башталат. (TSh)

Пикирлерди көрүңүз (4)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG