Кыргызстанда Саламаттык сактоо министрлигинде санариптештирүү боюнча министрдин орун басарынын кызматы киргизилди. Бул тууралуу премьер-министр Кубатбек Боронов 25-августта онлайн басма сөз жыйынында билдирди. Боронов ал кызмат үчүн өзүнчө штат ачылар-ачылбасын айткан жок.
«Пандемия убагында саламаттык сактоо чөйрөсүндө бейтаптар боюнча маалыматтарды тезинен иштеп чыгып, мониторинг жүргүзүүдө кыйынчылыктар келип чыкты. Ошондуктан саламаттык сактоо министринин санариптештирүү боюнча орун басарынын кызматы киргизилди», - деди.
Бороновдун айтымында, өкмөт медицина тармагында санариптештирүүнү тездетүүгө аракет кылып жатат. Пандемия күчөп турган июль айында өлкөнүн саламаттык сактоо системасындагы бир топ маселелер бар экени аныкталган. (TSh)